(Ni 23.3.2014 a Youth For Christ Inkhawm a ka thusawi)
New York khawpuiin an hlauh em em, police za zetin an buaipui a, an um a, an man tak electric chair-a an tihhlum tak, Crawley an tih pawh chu, mi a thah avanga thiam loh chantir a ni chungin ama inngaih dan chu dang tak a ni. Police a that a, mahse chu pawh chu ama inhumhim nan chauhva ti niin a tang tlat a. Miten mi sual, han sut palh pawha mi that duh zel khawpa nun chhiaah an sawi na a, ama insawi dan chuan, “Ka chhungrilah hian thinlung chau tak, mahse nunnem tak, tu mah tihnat duh lo thinlung ka pu a ni,” a ti ve tho.
Tum khat laia America rama mi hlauhawm bera an sawi, miten an fate tihthaih nana an hman khawpa an tihbai, Al Capone-a pawhin, “Ka hun tam ber chu mite tihhlim nan ka hmang a, mite tanpui nan leh an mamawh tihsak nan ka khawhral zo va. Ka hlawh erawh chu sawichhiat, rel leh dawta puh a ni, mi sual anga man tura zawn hial ka lo ngai ta zawk,” a ti a ni. America rama lung in hmingthang, ‘Sing Sing’ an tiha tang vengtu hotu pawhin, “He lung ina tang mi tlem te chauh hian mi sualah an inngai. Nang leh kei ang bawka mi pangngai, thil sual ti a an puh pawh thil tha tih an tum vang, chumi khami vang, tiin chhuanlam an siam thei vek a ni.” a ti.
Mi sual ber leh mi hlauhawm bera kan ngaihte mah chuti khawpa an inngai thianghlim a nih a, chuvangin, ni tina kan thian kawm thinte hi chu mi tha ve tawka inngai, sawisel tul lo inti an ni tih hria ila. Sawisel an tul pawhin, famkim lohna an neih pawhin nang leh keia lo zilh leh sawisel tur ni lovah an inngai dawn a nih chu. Mi sawiselna hi thian kawm dana tha lo leh tlaktlai lo, innelna aia inhuatna hringtu a ni thin.
Mi tu emaw a nun dan leh a tih dan simtir i duh em?
Mahnia intan hmasak a tul zawk mai thei. Mite siam that tuma kan hmanhlel laiin mahni hi chu kan inhre lo va, kan diklohna hi kan theihnghilh thin. Mi mit a hmawlhte hi, kan mita khanchhuk aiin kan hmu lian zawk hlauh thin. Zawngin a ngumkhak a hmu lova, a thiante ngumkhak a nuihzat an tih hi zawng tak tak emaw kan lo ti mai thei, keimahni hi kan lo ni reng si thin.
Thian kawm thiam leh mi te nel i duh chuan i thian kawm te hi englai mah in sawisel ngai lo la, an awmdanah eng emaw duhlohzawng i neih leh tlang takin an hnenah hrilh mai la, thian dangte leh midang dang hnena rel kual lovin, a hnena tha taka i hrilh chuan a ngaipawimawh ang a a insiam tha em em ang. A diklohna lai hrilhtu thian tha ah a ngai hlauh zawk thei che tih hria la, a hnena hrilh si lova midang hnena i relna an hre leh si a nih chuan kumkhua in thian thaah a ngai tawh ngai lovang che. I thian chu a rukin zilh la, midang hriatah chuan fak rawh. Mi tamtakin an thiante inngaihtlawmna chu an chen thin.
Mi nelawm nih kan tum tur a ni
Mi nelawm chu tute nge? Nui deuh huah huah thin te hi ami nelawm kan tih? Fiamthu thiam tak, thianho zingah pawh a fiamthu thiam leh titi kan ngaihchan deuh ber te hi em ni mi nelawm kan tih?
A ni thei tho mai tiraw.. fiamthu thiam leh nui reng thei te chu tum hmuk tum bur mai thin ai chuan an nelawm zawk reng ang. Mihringte hi thilsiamte zinga nuih theihna thilpek dawng awm chhun kan ni a. Vawk nui kan hre ngai lo, bawng nui vur vur pawh kan hre ngai lo, kan vawk te hi chaw kan pek dawn in lo nui tut tut mai se kan hlau ngawt ang. Mahse maw, mi uang lutuk te fiamthu chintawk hre lo an awm ve leh. Mi hmuhsit khawpin nelawm ngai suh ang che tih hi ka sawi duh. Mi chu a thil nuihzat ai a a mizia tilang thei engmah a awm lo.
Chuvang chuan fiamthu chintawk te kan hriat a, nelawm tum luata mi nuhsat khawpa awm palh theih a ni tih hria a a chintawk kan hriat a pawimawh.
Ngilneihna ngah tak, mi hriatthiamna ngah, tawngkam hawihhawm leh polite tak te hi chu maw tawng duh vak lovin kil khatah lo ngawi deuh reng mahse, mi ngainat a hlawh a, harsatna han sutkianpuitu atan chuan an lo rawn zawk zel chu a lo ni. Ngilneihna tawngkamin lei a ti na chuang lo tih hi hriat reng a, tawngkam hawihhawm khawngaihgna tel chi a al a ni fo tur a ni.
Tin, Hmelthat hi Pathian malsawmna a ni.
Hmeltha em em mi te nel si loh, tlangvalte ngaihzawn ngam loh khawp a hmeltha hawisang te hi nih hauh loh tur. Hmeltha deuh si induh em em mai, biak pawh biak ngam awm loh nih chu thatlai hun tawiteah awmzia a awm lo. Tlangval pawhin an rim ngamloh, mizo mipa a hmusit emaw tih mai tur, nula kan tam ta em em. Tunlaiin korean te kan en nasa a, mipa fai veng vung, ngo purh mai, a hming pumin ko ila a pilh hlok thei ang tih tur awm te che vel kan en nasa lutuk a, kan mizopui mipa te kan lo hmusit ve ringot ang tih a hlauhawm ta. kan sawi thui hret ang a.... Nakinah chuan tuna YFC a heti zat rawn inkhawm te hi in la bo duak dawn, lehkhazir in, hnathawkin... hmun dangah ram changkang zawkah in la kal bo duak ang. Chutih hunah chuan hnamdang hmeltha tak tak, nalh tak tak kan la hmu teuh ang, hnamdang neih ka sawisel lo, mahse kan mizo pui hi kan hmusit tur a ni lova, kan iai tur a ni lo tih hi ka sawi duh chu a ni. Kan hmelthatna te hi Pathian tan kan hmang tur a ni, hmelchhe deuh hlek ai chuan hmeltha si, fel bawk si chu Pathian in hmanna a ngah em em zawk dawn a ni.
Aia Upa Zah
Aia upa zah chungchang hi kan zirtirtu ten an sawi fo tawh thin a, chuvangin thui tak sawi ka tum lo. Kan upa telh telh ang a, keini aia upa, kan naupan lai a u en a kan en ngawih ngawih te nen khan pumruaah chuan kan inchen leh thuau dawn, rawngbawlnaah te kan inhmang ho a nih phei chuan thian ang takin kan inkawm zui chho bawk ang. Chutih hunah chuan hmana nang aia upa kha i umpha ta a ni reng reng lo. Pumrua a nang aia te pawh nise nang aia upa kha chu nang aiin a la upa reng a, Hmana i u kha i lo upat deuh tak avang khan i rualpui a ni ta thut lo, i aia upa a ni tih i hre reng tur a ni. Aia upa te nen chuan in ngam tak thian inpawh tak, in fiam bawrh bawrh ngam pawh ni ila a tul hunah chuan i aia upa a nihna kha i zahthiam tur a ni. Aia upa zahna chang hria apiang mi fing nih an hlawh a, an mahni zahawm takin an insiam zawk a ni tih hriat reng tur a ni.
A tawp berah chuan Nu leh pa zah chungchang
Nu leh pa nei lo tamtak he khawvelah hian an awm. An sual bik vang a Pathianin an nu leh pa te a laksak an ni reng reng lo. Thihna hi tu ta bik mah a ni lova, kan chunga thleng vek tur, chhungkaw tinin kan tawh tur a ni. Engtik niah emaw chuan i nu kha i pa kha a la boral dawn, chutih hunah chuan an damlai a i lo duat lo kha i inchhir hle tawh ang. Nu leh pa an la damlai chuan an hlutna kan hre tawk lo fo. I nu hlutna i hriatchhuah hunah chuan a sulhnu chiah hmuh tur a awm tawh ang an ti thin. Ka thianpa nu leh pa nei tawh lo a awm a, a ni pawh a nu leh pa hi thi turah a dah bik ngai reng reng lo. Nuamsa takin nu leh pa thlazar hnuaiah a awm reng dawn emaw a inti ve tho. Mahse tunah chuan an awm tawh lo. Harsatna a lo thleng a, mangang taka ka awm te hian Ka pa kha ka ngai thin. Ka khawhar chang te ka damloh chang te hian au vak2 in ka nu kha lo kir leh thei se chu theihpa tawp tawp a au nghek nghek hi ka chak thin, mahse a lo kir tawh dawn si lo, a ti. Chuvangin Nu leh pa te duat hi kan tih tur a ni a, lawmna chang kan hre tur a ni a, nu leh pa lawmthu hrilh te hi hreh reng reng loh tur a ni. Harsatna kan neih pawhin, manganna kan neih pawhin min hriatthiampui lo turah kan ngai mai thei. Mahse kan nu leh pa te hian kan kum zat ang hi an lo paltlang vek tawh, tleirawl an lo ni tawh thin. Kan harsatna ang hi min hriatthiampui a, a sutkian dan kawng an hria a ni tih hriat tur. Chuvangin nu leh pa te mimawl te pawh ni rawh se, zu in mi pawh ni rawh se,kan hmusit tur a ni lova, nakina kan inchhir lohna turin kan duat em em tur a ni a, lawmthu hrilh fo thin tur a ni. Chutiangin Pathian hnenah min hmangaihtu min enkawl seilian tu nu leh pa min pek avangin lawmthu kan sawi fo tur a ni.
No comments:
Post a Comment