REV. C. LALRAMPARA CHANCHIN TLANGPUI

Rev. C. Lalrampara (1933 - 2013)

         Pian leh Murna : Rev. C. Lalrampara hi kum 1933, July 11 (Nilaini)-ah Baktawng khuaah a lo piang a. A pa chu Upa Kapliana (L) niin a nu Thuamliani (L) Bible Woman a ni. An unau hi mipa pathum leh hmeichhia pathum an ni a. Chungte chu :-

         1. Vanlalrawni (L) w/o Thansanga (L) Republic Veng.

         2. C.Lalbiaknema (L) h/o Selziki, Republic Veng.

         3. Vanhnuaihrili(L) w/o Patlaia (L) Tuikual.

         4. Malsawmi (L) w/o Rodenga (L) Republic Veng.

         5. Rev.C. Lalrampara h/o Zaikungi (L) Aizawl Venglai.

         6. Upa Lalhlimpuia h/o Sangliani, Baktawng.

Kum 1933 Sept.10-ah Pastor Nikhama’n Baptisma a chantir a. Naupang harh vang tak, infiamna ngaina mi tak niin a lo sei lian a. Kum 13 a nihin Sikul a lut ve tan chauh a, an pawlah a thiam thei pawl tak a ni nghe nghe. Kum 19 a nihin pawl 8 a pass a. Chubak chu School a chhunzawm ta lo. A tlangval hun chu Baktawng khuaah a hmang ber a. Kum 1953 atangin Presbyterian Church Assembly (tuna Synod) Primary School, Chhingchhipah zirtirtu hna a thawk a. Zirtirtu hna hi kum 12 a thawk hman a ni. Sikula a thawh chhûng hian amah chauhin naupang thahnem tak a enkawl thin a. PSLC Exam-ah result tha tak a chhuah thin a ni. Naupang nungchang siam leh enkawl bakah sikul discipline a vawng tha em em thin.

Nupui neih : Kum 1954 April 2-ah Pu Sairothanga (L) leh Pi Vanthuami (L) te fanu, a hun laia nula zaithiam leh nula nungchang tha tak Zaikungi nen a hna thawhna Chhingchhip atanga Pastor awmna hnai ber Raldan (Thentlang) Biak In-ah Pastor Kawlkhuma’n a inneihtir a. An inneihna khua hi Chhingchhip atangin Km 12 laia hla a ni. Lehlangin an han innei a. Mo chu a pain Sechalin a thlah a, ropui takin an lawm a ni. He an inneih Golden Jubilee(Kum 50-na) hi April 2, 2004 khan Aizawl Venglai-ah ropui taka lawm a ni nghe nghe a ni.

Rev.C.Lalrampara te nupa hian fanau malsawmna an dawng tha hle a. Hengte hi an fate chu an ni :-

       1. C.Lalhmachhuani (L)

       2. C.Lalfamkima (L) h/o Lalhlani (L)

       3. C.Lalbiaktluangi w/o C.Lalzamlova Zotlang, Aizawl.

       4. C.Lalfakawmi w/o Hav.Lalruma (L) Aizawl Venglai.

       5. C.Lallianmawii m/o Jerry Lalngaihzuala, Aizawl Venglai.

       6. J.C.Lalhrilhmawia h/o Lalbiaknii, Aizawl Venglai

       7. J.C.Malsawmtluanga h/o Lilypuii, Aizawl Venglai

       8. C.Lalremsiama h/o Vanlalzawni, Aizawl Venglai.

       9. R.C.Lalruatchhunga h/o P.C. Zoramchhani, Aizawl Venglai.

Heng bakah hian tû 26 leh tû chhuan 19 a nei tawh a ni. 

Pathian thu zir leh Pastor hna : Kum 31 mi nia a fa 6-na a piang tep tawh tihin a thawhna Sikul chu Sorkarin a lak tak avangin a hna chu a bansan a, Pathian thu zira hun puma rawngbawl turin a inbuatsaih ta a. An chhangchhiat vanglai tak a ni chungin a nupui fanaute ei leh bar tur leh nitin mamawh chu ‘Pathianin a ngaihtuah ang’ tih chu a innghahna a ni tawp mai. Kum 1964 kum bulah Aijal Theological College chu a zawm ve ta a. In lamah an nuin chhangchhe tak chungin lo a nei kum tin a, an fa hnute hne lai pawh a fehsan thin. Ani hian a chawlh remchan ni apianga inhlawh chawpin mamawh a tuak thin a. Hostel thingtuahte lain a inhlawh thin. Pathian zarah an intungnung ve tawk tawk a ni ber e. A Pathian thu zir kum thumna hi Zoram buaiin a nang a. In lamah a nupui fanau ten pa ho lohvin rambuai an tuar na hle a. An innghahna awm chhun Pathiana an innghahna erawh Pathianin a chhang a. Tumah inhloh lovin an tuar chhuak a ni. Hetianga Pathian rawngbawl tura a inbuatsaih laia a nupui fanaute nena harsatna leh manganna an tawh hi a namai lo hle.

ATC-a kum thum a zir hnuin 1967-ah Raldan Pastor Rev. Robawiha hnuaiah Pro.Pastor atan lak a ni a. Mission Véng Biak Ina Synod Inkhawmpui chuan December 12, 1970-ah Pastor atan a nemnghet ta a. Kum 1971 atanga 1977 thleng Suangpuilawn Pastor Bial a vawng a. Kum 1978 atanga 1987 thleng Sateêk Pastor-in a awm leh a. Kum 1988 atanga 1992 thleng Sairang Pastor Bial vawng lehin 1993 atanga kum 1995-a a pension thlengin Armed Véng Pastor Bial hawn tharah Pastor hmasa ber niin a awm leh a ni. A Bial enkawl bakah hian Pastor thenkhat awm loh changin Bial eng emaw zat a lo hmui tawh bawk. Rev.C. Lalrampara hian Pastor hna a thawh chhung hian mi 3899 ( kum 2007 thlengin ) a baptist a. Nupa tuak 375 a inneihtir bawk. A pension hnu hian kum 1972-a Suangpuilawn Biala a awm laia Rs.1000/- a a in hmun lei, tuna an awm mekna Aizawl Venglaiah hian a inbengbel chhunzawm ta a ni.

A mizia  : Pa harh vang, fiamthu duh em em, kawm nuam, titi thiam leh mi hlim thei tak a ni a. Pa remhria leh fing tak a niin a pianpui finna hi chhuanawm tak a ni bawk. Mi frank tak leh dikna ngaina mi a ni a. Dik nia a hriatah chuan tim hauh lo leh huaisen taka tang tlat mi a ni. A enkawl Kohhranah Thlarau lam nun piah lamah Kohhran inawpna lam (Administration)  a ngai pawimawh em em thin a. A hun laia ti lutuk thina ngaitute pawhin Kohhran a kalpui dan a lo thatzia an hmuh chhuah leh tak thu hi a hnu leh thlengin an hrilh leh fo thin. Tin, taimakna hi a nuna bet tlat a ni a. A hna thawk nasa leh taima lutuk hi a chhungkhatte leh thian leh rualten an hauh zinna ber a ni hial bawk. Lo a neih thin lai pawhin a hna thawhna hmanruate zan mut dawnah lukham bula inchhawp lawk vek thin mi a ni a. Khawvar chian hmain lo lam panin a liam daih tawh thin. A hna thawh laia a thuamhnaw thlan tuiin a bual huh vekte chu  mi dangin an sawr pui hial thin a. Chutiang taka nasa a hna thawh chu a nun tihlimtû ber pakhat a ni thin.

A pension hnu lam : Kum 1995-a a pension hnu hian Pathian zarah a taksa leh ngaihtuahnate a la chak tha hle a. Rawngbawlna kawng hrang hrangah a theih ang tawka inhmang zuiin, kan ram ei leh bar dinhmun leh intodelhna lam hi a vei em em a. Intodelh lo leh chawmhlawm ni chung chuan  kan Pathian thu sawi thinte hi  ringlote-ah a tlak nat theih loh phah thei tih chu a thupui a ni. Chuvang chuan Lo neitu inzawm khawm pawl, All Mizoram Farmers Union (AMFU)-ah telin ei leh bara intodelh tulna leh huan lo ram nghet neia eizawnna chungchangte tlangaupuiin Zoram dung leh vang a fang a. Khaw hrang hrangin  an khuaah chu thu tlangaupui tur chuan an sawm thin. A theih ang angin loneitute hnenah AMFU atanga tanpuinate semin a dawng tlak an nih leh nih lohte fiahin an huan lo ramte a tlawh chhuak dap thin. AMFU-ah hian hruaitu zingah telin Treasurer term hnih leh Vice President term khat a chelh a ni. AMFU bakah hian Samaritan Society leh Mizoram Upa Pawl (MUP)-ahte Executive member niin a theih ang tawkin a inhmang thin bawk.

A nat dan : Hun rei tak kal tawh atangin natna eng eng emawin a tlakbuak fo thin a. Mahse, vanneihthlak takin Pathian zarah damdawi hmangte leh a rilru paukhauh leh huaisennate avangin a dam chhuak leh mai thin. Pumpui ulcer te, malaria etc. te pawh tun hma deuhin a lo nei tawh thin.

Kum 2006 chhûng khan natnain a tlakbuak zing hle a. June thla atangin khawsikin a man tan a. Presbyterian Hospital, Durtlangah tum thum admit a ni a. Greenwood Hospital-ah tum khat admit a ni bawk. Hemi kar lakah pawh hian private Doctor-in a enkawl reng bawk. Greenwood Hospital atang hian Kolkata Kothari Hospital-ah refer a ni a. September 13-18, 2006 chhûng awmin dam takin an lo haw ta a. A dam lohna avanga thla thum zet Pathian Biak Ina a inkhawm tawh loh hnuin, Kolkota atanga a lo haw atang hian Biak In lam a lawi ve leh thei ta a ni.

Hetianga dam taka a awm hnu hian kum 2007 Good Friday (6.4.2007) kar chhoah khawsikin a man leh ta tlat mai a. Good Friday hma zan (5.4.2007) chuan nuam vak lo chungin Armed Véng North kohhranah Lalpa Zanriah Sacrament a buatsaih a. Hemi zawha ina a haw chu namen lovin a khua a sik ta a. A tuk lamah pawh a ziaawm theih tak chuan loh avangin Good Friday (6.4.2007) chawhnu lamah chuan Presbyterian Hospital, Durtlangah tlan chhoh puiin admit a ni leh ta a. Kum 2007 atanga 2013 chhung hian Synod Hospital, Durtlang-ah vawi engemaw zat a lut a. Nikum 2012 atang phei kha chuan zan lama Biak In a thleng ngai ta meuh lo a, Pathianniah erawh chuan a inkhawm ve hram hram a, dar rik rualin Biak In a pan a, inkhawm chhung zawng taksa chau em emin a thu tluan ve hram hram thin.  Kumin 2013 February ni 16-khan a chak loh tak em avangin Synod Hospital-ah bawk admit leh a ni a. Hemi atang hian a hriatna lam pawh a fim thei ta meuh lova, thla khat chuang zet a awm hnuin March 22, 2013-ah In lama inenkawl zui turin Damdawi in a chhuahsan a. Hma a sawn theih chuan meuh loh avangin April 25-ah a lut leh a. May 4-ah lo chhuak lehin in lamah enkawl chhunzawm a ni leh ta a ni. A ni tela chak lo telh telhin September 12, 2013(Ningani) nilengin a khawsik a reh thei ta lova. Ni 14-zanah chuan a thaw a rawn hah tak avangin zan dar 10:00 pm-ah Durtlangah chhohpui leh a ni a, Oxygen pek nghal a ni a, a B.P. a hniam hle bawk. ICU-ah dah nghal a ni a, beiseina sang tak kan neih laiin nimin September 15, 2013 chawhnu dar 1:00 PM khan a sawi fo thin ROPUINA RAM-ah min kalsan ta a ni.