Guide Me

Hmani zing chu ka thianpa mu ka han kaitho a, a computer ka khawihkual sak naah Mizo thalai tute emawni (Murphy, Joe Dirt ft Emily an inti) A Song title - Guide Me, Gospel Rap ni awm tak hla hi a lo nei a, a nalh reuh lutuk e a tia, kan copy ve thla ngawt a.. Ka haw hnuin thildang tih pah mai maiin ka han ngaithla a, an hla verse hmasa ber chu english a ni phawt, a nalh pangngai viau.. Verse tawplamah chuan he hlathu te hi an rawn zep zeuh a, ka ngaithla nawn leh a.. a hlathu hriat chian tumin ka ngaithla nawn leh.. A hla thu te chu ka duh reuh ta em em mai a, a Rhyme a inlalawn nalh ve reuh hle.. Heti hian an han phuahchhuak reuh a -

Misuaksualte vanneihzia ka hmuh in,

Uangthuangho chu ka awt si a.

Ka nunin thil tha tih a duh in,

nawmchenna ka thlah a ngai si a.

Nun a beidawng khawvelah hian;

lawmna a kin fo he leiah hian.

Sual kawng ka zawh, ka nun bawlhhlawh 

paihthlak tumin ka bei thin tawh.

Mihring chakna theihna mai chuan

A tlin silo min puih loh chuan.

Ka Lalpa chakna rinchhanin,

min chhandam tawhna avangin,

Hmalam panin ka kal zel dawn,

Ka tan tawh dawn ama duhzawng

Ka van Pathian khi a nghing lovang,

Isua hnenah chuan ka him reng ang.

A ni ngawt asin. Keini ai pawha fel vak bika kan hriat loh, Pathian trihna neilo ve tak tak te ei leh bar zawnna kawnga an tluang purh mai han hmuh te, Pathian hnena inhlan tawh ka nih avanga ka tih ve thiang tawhlo khawvel nun chen a hlimhlawp bawl ho te han hmuh chang hian an hlimhmel in an nun hi awhawm tih chang ka nei fo thin.Mahse Pathian hnung ka zui chuan heng nawmchenna te hi ka thlah a ngai si a. Nitina kawngdik zawh a Ama duhzawng tran tlat hi mihring chakna ringawt chuan a van har thin em! Mahse Lalpa chakna rinchhan chung chuan ka thei a ni. Hmalam panin ka kal zel anga, ka sirah thlemna tui nasa taka lo fawnin thlipui nasa tak in min nuai mahse, chung thilte chu en lovin ka himna tur Krista chauh chu thlir chungin he  hringnun Jordan lui hi engtikah emaw chuan ka la daikai ngei ang.

A her zel ang

Siamtu chuan ka ruangâm a din hma kum 2000 hmalamah khan ni sarih chhung lekin heti khawpa kan thlakhlelh tur khawvel hi a lo din tawh a, engkim mai famkim vekin a siam zova, thosi inthlahpun dan hunbi te, mihring thisen insemkual dan leh sik leh sa inthlak tawn dan te thlengin awmze mumal tak neiin a lo siam tawh a ni.

Chumi Ni atang chuan he ka khualzinna khawvelah hian mihring chhiarsen lohten vanglai an lo chen tawh a, chutiang zat vel bawk chuan mual an lo liam tawh bawk a ni. Mahni a ka inngaihtuah chang hian mahni inngaihsan hi a lo van awl thin em! Engtik niah emaw chuan he ka nun hian a zinkawng a la zawh tawp ve ngei anga, chumi hunah chuan ka thian min ngainatu te, ka khawsakpui ka chhungte leh ka hmelhriat mi hrang hrang te hi keimah vangin an tap ngei anga, he ka chenna zawlkhawpui pawh hian eng dang tihzai mah rel lovin a ngui ruai dawn hian ka han suangtuah a, dam leh theih ni dawn se chu han thih chhin vel te ka chak hial thin alawm! Engtiang chiahin  nge keimah avang hian mihring mittui a luan a, pangpar engzat a tamin nge ka ruang rawn thuam mawi ang? Ka sulhnu an hrereng tawh tur leh lungleng taka ka chanchin kal tawhte an han sawi vel tur chu! 

Mahse, mahse...  chu mahni hmasial ka mihring ngaihtuahna chu ngaihtuahna fim zawk in rang takin a rawn thlak a, ti hian min rawn thlaksak ta! He Khawvel mihring maktaduai 6000 chuang zinga kei mi pakhat, thiamna chungchuang leh mi te aia chungnung bikna pawh neilo hi.. khawvel ram zau tak kil khata ka lo thih ve avang mai hian a kalphung hi a danglam dawn lova, he khawvel êng ka lo hmuh ve hma kum tam tak ka tel lova hun a lo inher thin ang khan, chu ka thih darkar ah ngei pawh chuan a kal ngai reng in khawvel hi a kal reng ang. Ka chhuan ve thin ka thil tha tihte, mite fak ka lo hlawh ve tawh thinna te pawh chu tukhaw hriat lovin a la thamral mai mai dawn zawk a lo ni. Ka telloh avang hian Pawl inrelbawl dan a buai dawn lova, Ka awm dawn tak loh avangin ka hmun awl chu hnawhkhah lovin a awm kumkhua dawn hek lo. 
Mihring nun hi a tawi a, kan damlai nun chhung hi kan ropui lai tak a lo ni. Kan khawvel a tawp hun a mite hriatzui tur sulhnu ropui hnutchhiah ka nei a nih ngawt loh chuan zawi zawiin hlim taka ka lo chen thinna khawvel atang hian ka hlimthla pawh a la thamral dawn a lo ni. Chutih hunah chuan thangthar leh chhuan thar lo awm zel te zingah chuan kei RIANGVAI hian hriatzui ka hlawh tawh lovang a, chu mai pawh ni lovin, ka piang ve a ni tih pawh hi an hre tawh ngai lovang.

Remna Ni-ah KTP Retreat (30.6.2011)

Vawiin chu kan Branch KTP ten Mosia Garden-ah Retreat neiin hun kan hmang a, a hlimawm in a hlawkthlak hle mai.

Tukin zing chu khua a dur khuih a, khua a chhe leh ngei dawn niin a lang. Pathian hnenah kan dil a, khua tha tak min pe em ang chu! Retreat naa kal turin zingah hma takah ka insiam a, mahse ka pheikhawk bun tur a lo la kau zui! Dendrite in kan char ngial a, mahse a tha theilo a, tumloh deuh in pheikhawk dang ka bun ta daih. Branch in rem a tih tho avangin Bike ken mai ka tum a, ka thianpa nen kan inphur chhuak a, mahse ruah a rawn sur leh ta chiam mai a, kan innghahkhawmna hmun kan thlen in Bike kenchi dawn lohva a lan avangin kawngsirah ka hung tha a, Bus in member dangte rualin kan kal leh ta zawk a ni. Bus hnung kawngkharah kan memberpui pakhat nen kan ding dun a, kan titi tui hle a niang, hriat loh karin kan Retreat na hmun tur Mosia Garden chu kan lo thleng der mai.  KTP Hruaitu Puitling tak tak Pathian in kan Branch min pe hi ka ngaihtuah chang hian ka van lawm thin em! Hei hi midang chhiar tur a nih avanga ka sawi mai mai a ni lova, tih lawm ka tum vanga fak der lah ka ni hek lo. Ka thinlung tak tak atanga ka sawi a ni. Thusawitu tha tak tak dang rawih ngai hauh lova KTP Member-te Retreat min neihpui thei Hruaitu kan nei hi ka thinlung tak in ka lawm em em a ni.

Branch Leader in thuchah tha tak mai a sawi a, tunlai khawvel a thalaite min tichhe mektu Addiction chungchangte, rawngbawltu pawh thliar lova min runtu Pornography chungchangte, Krista Hmangaihna chungchang te leh thu tha dang tam tak a sawi a, a zaivai chuan hre tawhlo mah ila ka rilru a hneh in ka nun a chawm takzet a ni. Hunserh kan hman zawh in member te kaldarh in mahni a Bethel na hun kan hmang a, Pathian nen hmun reh tak maia hun hmandun chu a lo nuam hle mai. Bible ka chhiar a, ka nun chhungril ber leh ka unau, ka Nu & Pa pawhin min hriatpui reng reng loh ka nun thuhruk thlengin Pathian hnenah ka inbunruak a, ka thla a muang huai a, ka hahdam sawng sawng in ka hria. Tawngtai ngailo ka ni lova, Pathian pawl ngailo pawh ka ni bik lo, mahse tihtakzetna hian mihring nun chu a lo khawih danglam nasa thei ber a nih hi.

Chawhnu lamah Boruak hlimawm lam hmangin tui te kan han cheng a, a nuam ka ti lehpek hle. Kan naupan laiin luiah te kalin tui hi kan lo cheng ve fo tawh thin a, thingtlangah kan awm thin avangin Aizawl naupang tamtak thiamloh tur leh hmuhphak loh tur hi ka ti ve tawh in ka hmu ve nual tawh thin chuan ka hria. Mahse tuihleh kher kher hi zawng ka la thiam thei mawlh lo a ni e! Mahse liluh chung hi chuan ka thleng thui ve thei teh mai a nia aw.. ka lâng thiamlo mai mai alawm!! Haha.. Vollyball te kan beng ve leh lawp lawp a, ka chau ve hle mai. Ka taksa chum tha tak hian insawizawi hi a lo mahmawh takzet tawh a, a mamawh mai pawh ni tawh lovin a taksa neitu Kei hian ka taksa chungah hian a bat in ka ba takzet a ni. Sawizawi peihlo chung chung pawhin vawiin ni thlengin harsatna em em min la thlen lo a ni si a. Ka duat ka taksa hi ka la sawizawi em em ang… ka taimakna zawng zawng erawh ka sawmkhawm a ngai dawn a nih hi!

Tichuan tlai lamah Bus bawkin kan haw leh a, kawng lakah Pathian in min veng a, harsatna leh tawhsual engmah kan tawk lo. Kan chuanna lo zawk Bus erawh chu kawng lakah a ke Puncture an thlak. Ka Bike chuan nilemngin mi In kawtah min lo la nghak ran a, misual laka min lo vensaktu Lalpa, ka lawm e. Dar 5:30 velah dam takin In ka thleng leh a, ka thlakhlelh em em ka Room-ah lungmuang takin ka awm leh ta.

New Chapter (29.6.2011)

Blog hi vawi tam tak tha tak a siam hi ka lo tum tawh thin a. Free domain hrang hrang pawh ka lo hmang kual tawh thin. Mahse puitlin tak tak lovin ka pamtul leh ziah a. Hei tun tum chu tumna tak tak nen kum 2009 a ka siam tawh he Ka bolg hi ka han chhunzawm thar leh ta a, eng tak ang ang maw.. Ka blog hi i lo tlawh ve thin a nih chuan ka lawm hle anga, fuihna min pek phei chuan nasa takin hma ka sawn ngei ang tih ka ring tlat a ni.

Ka chan tawk lunglen

- Benji

Mimkut thla laihawl vel a ni a, Zawlkhawpui chu a reh ruih a, zan a rei deuh tawh avangin thawm liantham hriat tur em em a awm tawh lo. Chutih lai chuan keini Zawlkhawpui tlak lama awmte chuan current kan neih loh lai a ni lehnghal a, mut ti tui tawkin ruah a tla ser ser zui bawk nen. Keini vengah chuan khawlaiah mihring hmel hmuh tur an awm tawh lo. Mahse he zan hi ka tan chuan hun rei tak chhung ka kalbo hma a ka zan hnuhnung ber tur a ni tlat a, chuvang chuan mut bosan mai ka tum lo. Ka Hmangaih-i nen chuan inthlahlel takin chu zan hnuhnung, boruak vawt var mai hnuaiah chuan kan inpawm vawng vawng a, rinawmna thu uluk taka inchah lawm lawm in, a tu amah haw hmasa nih duh hek lo; kan awmna hmun atang chuan ruahsur chu chhuanlamin ruahsur ban hun chu kan nghak ta ngawt a. Ruahsur a ban meuh chuan zinglam Dar 2 a hnai thuak ta mai, tichuan aktuka Hostel lam pan tur ka nih bawk si avangin ngai dawn hle mah ila ka Hmangaih-i chu ka kalsan a tul ta si. An Gate bul kan thlen chuan a tawp nan ka han fawp leh hram a, in pawm vawng vawng in kan inthlah ta a. In ka thleng a mut zai rel ka han tum pawhin ka muhil thei meuh lo. Lunglen lawkna chuan min tibuai a ni!

Tichuan Hostel lamah chuan riahrun chu ka han rem ta a. Zirna avanga awm ka nih tehlul nen a aia lian zawk lunglenna chuan ka rilru a luahkhat zo a ni ber mai. thian hova kan awm hova, lungkham em em pawh nei lova kan nuam tihzawng leh chakzawng tihpuitlin tuma hun leh ni kan chhiar lai te kha ka ngai thin. Chu ai mah chuan ka Hmangaih-i te kha! ‘Min ngai ve ang em..? Ka tan rinawmna chu a lo vawng zel ang em..?’ chung thil chuan hun eng emaw chhung chu ka rilru a luahkhat thin a, zanah pawh muhil thei lovin Corridor atangin thla eng chu ka thlir vawng vawng thin a ni.
Hun leh nite a lo ral zel a, Hostel kan chhuahsan hun pawh a lo in her chhuak ve leh dawn ta reng mai. Hreh taka kan luhna Hostel chu kan chhuahsan ni a lo thlen dawn meuh chuan lung ti leng tu tur a lo ni leh zawk ta si. Nitin athlum aal ka eipui, vui thu leh hlimna thu ka thlenna thin ka thiante ho chu ka ngaih ber tur te an lo ni leh ta zel a.. 

"Perhkhuang rem zai kan vawr lai,

Khuarei nunhlui chang mai tur an,

aw! a pamhmai lua e...

Kan zan hnuhnung berah chuan mut pawh kan mu phal hlawm meuh lo! Kan lung a leng lawk tlang em a ni. A tuk khawvar chuan kan inthen darhna tur Ni chu a rawn her chhuahpui ta.. Kut thinga inchibai lawp lawpin mahni In lam theuhah kan liam ta sang sang a. Keipawh kan In lam chu ka han pan ve ta a.. Mahse, hmana kan In kha erawh a ni tawh lo. Hostel ka awm chhung khan veng tharah, ka Nu leh Pa ten neihthinglung khawnga an lo din ah chuan kan lo insawn reng tawh a lo ni a. Chhungte nen chuan hlim takin kan inhmukhawm a a nuam khawp mai. Mahse ka thiante hmel hmuh tur an awm ta tlat lo, ka ngaih em em ka thiante- kan thenawm hnai lawk lawk a awm thin kha tunah chuan veng dang thian an lo ni ta. Mahni In ngeia awm ni tawh mah ila sawi thiam theih si loh hian ka rilru chhungril takah hian ka khua a har ru tlat a, mahse theihnghilh luih hram ka tum thin. Hun remchang ka neih hmasak berah ka thiante awmna lam, kan veng hlui lam pan chuan ka kal ta hnak hnak a- Lam ang ka lo let leh ta e Vala,Min lo hmuak dawn lo’m ni chhuahtlangah.. Hun rei tak chhung inhmu tawh lo kan han inhmu khawm leh chu kan hlim ve dar dar hle. Inhmuh loh chhunga kan thil tawn theuh sawi kan inchuh nak nak hlawm a,. thian hova kan awm khawm hi chuan ka tan chuan a aia nuam leh thlakhlelh tur a awm chuang reng reng lo. Mahse ka thiante chuan thu lawmawm loh leh lungchhiatthlak tak, vawiin ni thlenga ka rilru tina tu leh ka mittui surtir tu min hrilh ta tlat mai.. Ka Hmangaih-i chuan rinawmna thu kan tiam chu hlenchhuak zo lovin, ka Hmangaihna par vullai chu thliakin lengdang tang min lo beisan reng a lo ni a… Mahse he thu hi chu sawi thui ka duh lova, ka tum tawh bawk hek lo. He Hmangaihna nunrawng avanga ka tuarna hi a tam ta em a, han tharthawh leh hi ka chak tawh hlawl lo ani. 
Thiante nena inhmuh khawm chu a khat tial tial a, ka awmna veng tharah lah chuan ka la tlangnello nasa mai si. Ka thiante lah chuan min rawn tlawh khat tial tial bawk si. A dik tak chuan ka thiante hi chuan min ngai ve hle mahse hetia veng danga awm ka lo nih tak si ah chuan hun a liam zel angin min thlakhlelhna pawh zawi zawiin a kiam ve zel ani tih pawh ka hai lo. A hu hovin veng khatah an awm a, kei mi pakhat lek hi min ngai vawng vawng lovang tih chu ka ringhlel hauh lo. Mahse keimah zawk hian ka thlah thei hlawm ngang bawk si lo. Ka inngaihtuah lungpuam lai chuan, ‘ka pan tawh bik miah lovang..’ ka han ti a, mahse a tawp a tawpah chuan ka liam thla leh vawn vawn lo thei si lo. Ka han thleng thla a, ka telve lohna sulhnu hlir ka zuk hmu a, an zingah te chuan mi hrang riauin ka inhre leh zel a.. Han inhmuh takah chuan min ngaih thu min fah leh liam liam lawi si! Mahse chung biahthu te chu a der mai niah ka ngai zo ta vek mai. Aw.. khawnge hmana ka hlimna te kha an awm tak? Ka ngaih em em ka thiante kha tuna mi tho hi an ni lov’em ni? Engatinge ka thiante ngei ngei pawh ka rin zawh tawh loh? Zawhna hlirin ka rilru a luahkhat zo ta. Ka tan hian mahni inkhawngaih mai loh chu tihtheih dang ka nei hlawl lo!Khawhar luat avangin ka thiante chu ka pan a, khawhar tak vek in ka hawsan leh ta hnak hnak si a…

“Loneliness is my only friend.”