THIL THA TIH DUHNA

 Kan chênna In bul hnai maiah vântlâng zun in a awm a, mahni Ina inthiar fel mai âwm tak kha khawi ilo kal tûra chhuah zet tawh hnuah zunram thiara han luh kawi ka nei zauh zauh. A kiang mai YMA Hall hnuaiah vântlâng tuikhur a awm bawk vâng ni maw, eng emaw lai aṭang khan he vântlâng zun inah hian bucket an hûng a, tui a lo khat leh liau zêl tih ka hmu tawh ṭhin. Ka ngaihtuahnaa lo lût chu, ‘He vântlâng zun ina bucket-ah hian tuin nge maw tui hi lo chhûng khat reng ṭhin le?’ tih hi a ni.

Synod hnuaia Pastor pension pakhat chuan tû tirh leh mawhphurhna pek mah ni lovin an vêng vântlâng zun in a silfai a, hnâwmhnawk a khâwm fo ṭhîn an ti. Chutiangin, kan vêng pa ṭhenkhat zîngah hian ngâwi renga hnâwm lo chhar khâwm a, a awmna hmun lo tûra awm te lo senghawi zat zat ṭhîn an awm bawk. YMA thlân laih hnatlâng (kan vêng chuan hnatlângin kan lai tlângpui tawh ṭhin)-ah pawh kan thawh chhuah a kan bun ho dial dial kârah ngâwi renga thân laih piahlam - tui ûm ruakte, sarâng hluite lo khâwm a lo paih fai nghauh nghauh ṭhîn an awm. Hêng mite hian tu fak leh châwimâwi mah an phût lo va, a mi nâwlpui phei chuan an ti ṭhang êm a, a tûr ve rêng emaw tiin kan en liam mai!

Mihringte hian mahni tâwkah thil ṭha tih duhna kan nei vek a, Bible-in ‘Ṭha duh hauh lo’ a tih te zîngah ngei pawh hian ‘tu emaw’ tân tala thil ṭha tih duh hlawl lo hi chu an awm meuh lovang. Setana kohhran dintu an tih mai Anton LaVey meuh pawhin, “A phûte chungah chuan ṭhat chhuah rawh.” a lo ti ve mauh mai bawk. Khawvêl dânin thiam loh a chantîr, misual; thi tûra a chungthu an rêlsakte meuh pawh hian, an hmangaih ber an rîla rahte tân chuan nun kawng dik leh ṭha an duhsak tho ngei ang. Chuta ṭanga langchiang chu, thil ṭha tih duhna hi mihringten kan pianpui leh kan zepui pakhat a ni ngei mai tih hi a ni. Chutih rualin kan thil ṭha tihte, kan ngilneihnate leh khawtlâng tâna kan thawh venate hian lukhâwng a neih dâwn loh a, midangte hriata puanzâr a nih dâwn loh ai chuan tâwpsan mai duh mi a awm theih ngei bawk ang.

Tûnlaiah social media kaltlanga phochhuah mi ngilnei leh thilphal tak takte, midang tâna malsâwmna ni tûra luangchhuak mi ṭhahnemngai eng emaw zât he ram khua leh tui zîngah pawh hian hmuh tûr kan awm ta, a ṭhain an ngaihsânawm takzet a, châwimâwi leh châwisân an hlawh dâwn anih phei chuan, puangzâr lo va tlângzarh kher lote mawlh hi kan hmaih thiang lovang.

Tlâwmngaihna leh midangte tâna luangchhuak nun hi ‘Mizo zia’ tiin kan chhuang ṭhîn, a dik e. Amaherawhchu, hnampui leh hnam dangte zîngah pawh hian he ze dik pû hi hmuh tûr an lo tam nangiang mai. Chuvâng alâwm, mizote ta bîk pawh ni lovin ‘mihring zepui pakhat a ni ngei mai’ ka tih ni. A hmang chhuak duh leh lantîr duhten an hmangchhuakin an lantîr mai niin a lang.

High School mizo subject-ah Pu Vanneihtluanga ziak ‘Fak hlawh lo vâl rual’ tih hi kan zir ṭhîn a, a târlan mizo tlangvâl rualte khân fak an va phû tak êm! Chutih laiin ‘Fak pawh hlawh lo ka nih hi’ ti a lo tau nghawng nghawng kan awm bawk. Târlan kher, châwimâwi kher leh hriatpui kher phûta thil ṭha tih tum mi chuan tauh nî a nei nge nge ṭhîn. Midang tâna malsâwmna nih te hi a hlut teh lul nên, a thil ṭha tihte hre renga sawi lang fo mai mi chuan nuihsan a hlawh zâwk hlauh bawk zu nia!

A thui hle mai, i chhiarchhuah avangin ka lâwm e. Thuziak thiam lo chuan tawi tê pawh hi kan ziak duah zêl rêng a ni.