"Runhmun lendung ang aw.." tiin thu kan lo tiam tawh a, mahse a lungmawl vangin min liamsan leh ta mai a... Thui taka sawi ka tum lo; Mahse hei chauh erawh-
Keizawng, he khawvelah hian Hmangaih nei tura Pathianin mi pangngai a min lo siam ve a nih ngat chuan, engvang pawhin min thenin min hliam mahse, chu Hmangaihna ngei chu a ni hnenah khan ka lo hlan tawh si!
Lunglen hi enge a nih a, Di then hi eng tiang chiah a nâ nge a nih tih zir a, hrethiam turin; Hmangaihtu thinlung chuan a tuar chho tan ta!
Ni chhuak in mawina a nei lova, Pathian malsawm zing boruak thianghlim hlutna chu ka chhut pha ta lova, buai taka hnathawh in lunglen a tireh lova, hahchawlhna tur zan boruak dai in hahchawlhna a thlen hek lo. Harsa takin zan mu ka chhing thei hram a, mumang ramah lehzel pawh ka lo au zui lawm lawm thin! Mihringte neih hlu ber Beiseina tlem te la awm pawh a ni telin a bo tial tial a, Darkar a liam a, ni a liam a, chawlhkar a liam a, thla mang leh thla bial zat pawh chhiar tham a tling chho ta.
Chutia beisei tur reng nei lova khawhar taka hnemtu nei lova ka awm lai chuan a ni, nang ka tawn tak che ni! I mize harh vang tak leh i inrintawkna te, i tawngkam hawihhâwm tak mai te chuan ka ngaihtuah lawk loh thil hrang hrang mi ngaihtuah tir zut zut a... i hmelthatna leh i duhawmna zawng zawng te chuan ka natna ata min chhawk a, I nui hmel mawlh mai kha! beiseina reng nei tawh lo tan pawh khawvelah hian beiseina thar a lo piang leh thei a ni tih min hriatchhuah tirtu a ni. I hlim hmel ka hmuh in hlim ka zir chho leh tan a, i nui hmel pawh nui hmelin ka chhawn leh thei ta che. I bulah chuan ka khawharna te ka lunglenna te kha a bo dawn dawn thin! Ka ngaina che a, ka tilang ngai lo tih erawh ka inhrechiang hle mai.
Mahse maw... hei hi thil pawi tak chu a ni! Midang hnena Hmangaihna hlan nawn leh turin hmangaihna dang ka nei tawh tlat si lo a nih hi! Ka laka i rilru put thin danah te, i mi duhsakna zozai te.. ka mitmeng leh ka hawiherah rilru khingbai ka pu a ni tih hre reng chunga i haider lui tlat te, chuti chung chung pawha vuina zawng lova min ngainat luih i tum tlat te kha maw.. ka va han phu lo tak em!
Demna che ka nei lo, kawng engkim kha ka bul tan a ni si a. Mahse, Khatia nangnen kan in tawn leh tak mek lai khan maw... Inchhira tap thawm ka hre ta tlat mai! Tu chu maw?? Hmelma chimawm ber he thinlung hian, sira min hnawl tawhtu, ni tam tak hrehawm reng reng a min lo siam tawhtu, inchhira a tap thawm chu a nêp thei thlawt lo! Kan kar chu zau viau tawh mahse Hmangaihna avang chuan pawm leh lo theilo dinhmunah ka ding a, ka beiseina thi tawh chu kaihthawh in a awm a, ka rilru chuan awn lam a nei leh ta hu mai! Mahse, nang i awm tawh si! Rilru a phir in mang a va ang tak em! Mahse, thutlukna siam lo thei lo ka ni a.. thutlukna chu ka siam a ngai ta.
Tu hnenah nge ka sawichhuah ang a, tuin nge ka rilru put hmang hi hrethiam ang le! Ka chan tur chu maw...mi rilru lèlo leh nghet lo, luang thli chhem len ang maia duhtu lam apianga thle kawi mai mai dinhmun chiah chu a ni.
Mahse, mi dem hlawh ka hlauh vang ringawtin ka Hmangaih ka neih let leh theihna hun remchang tha hi ka bawhpelh dawn em ni? Hmangaih reng chung siin, tlawmah ka lak avang ringawtin hnunglam lo chhawn ta ila, kumkhuain ka inchhir leh si lo'ng maw?
Hreh tak chungin ka thutlukna chu ka hrilh che a tul ta a... Ka rilru put hmang i bula ka sawi zana i tah hla leh i mittui far zozai kha ka damchhung hian ka rulseng dawn lo che a, i mit hmuhah chuan mi tenawm ber thawmhnawm inbel ang ka ni tih pawh ka hai love... Mahse, i thinlung ka tih keh sawm zanah pawh tawngtaina nen min thlah thei a nih kha maw! Hlim taka awma Kristian chhungkaw din tura mittui kara i mi duhsakna awka kha a va mawiin a va inthlahrun awm ber mai em! Mi angin fel famkim lo mah la, mite neih ve loh nun hlimna thuruk i nei tlat kha i van awh awm em! Hlimna tamtak min pek kha hlimna veka rul let lo chein tahna ruamah ka hnuchhawn ta che a. Hmangaihna avangin mi nunrawng berah ka insiam ta! Chu chu ka kalsan zan che, i chanchin ka hriat hnunhnun ber nizui ta bawk chu a ni.
Hun leh ni an liam a, keipawh ka nupui fanau te nen chhungkaw khawsak pangai ve tak niin Pathian malsawmna kan dawng a, ka fa te zawk pawh class 1 a zir ve ta. Nikhat chu ka fapa upa zawk nen motor sil a kan teichhuah pahin hnathawhna avanga khaw hrana kan awm hlana mual min lo liamsan ta ka thianpa thlan tlawh pah turin an veng thlanmual lamah kan inkhalh thla a, tleirawl hun hlimawm tak mai ka lo hmanpui thin, khawi ilo kal apianga ka kawppui chawt thinin min han awmlohsan ta mai chu hriatthiam a har in ngaihtuahna a thui duh hle mai. A thlanlung bula hnim lo to te chu kan han pawtfai thuak thuak a, haw tura kan inbuatsaih mek lai chuan thlang lam panga thlan vung tharlam tak chuan ka mit a la ta tlat mai. Muangchangin ka zuk pan thla a, hnai lehzualah ka va panphei a, chu thlana Thing kross an phuna hming ziak ka han hmuh zet chuan ka thin a va thawng em! Kum 10 chhung zet Pathian zarah chhungkaw pa ber dinhmun ka lo chelh ve chhunga ka rilru a thi theilo mi pakhat, harsatna leh manganna ka tawh apianga ka thinlunga rawn lang thin, kum engemaw zat liamta a tahna ruama rilru natna leh hrehawmna tinreng tuar tura ka kalsan tak; mi hmangaih dan min zirtirtu leh a chunga ka thil tihin nasa taka ka nun vawlet a thlakdanglamtu ngei chu, he khawvelah hian vawi khat mah a hmel ka hmu leh tawh lo ang maw...!!
Khawnge a awm ang a, pasal fanau te a nei ve tawh ang em tia a ruka ka ngaihven reng thin kha hetah hian a ni maw khawhar taka i lo zal le! Ka bula thlamuang taka i nui hmel kha nimin ralta ang maia chiangin ka mitthlaah a rawn lang nawn leh a, i chunga ka thil tih avanga tawngkam khat pawha ngaihdam dil lovin vawiin hi ka thleng a ni tih ka ngaihtuah chhuak nghal a. Ka bing mup a, ka mittui lo hnam chhuak chuan ka khawhmuh a ti phe nghal ruai a, ka fapa in hrilhhai hmel taka min en pawh chu hrechang lovin, i thlan chunga Kross an phun chu ngawi reng a kaikun chungin ka vuan ta ngawih ngawih a.
I duhthusam thin- Hmangaihtu diktak i Siamtu chu i tawng ta a, a hnenah chuan Chatuana dai tawh lo tur Hmangaihna dawngin thlamuang takin chawl tawh ang che. Ka bula hun i hman chhung reilo teah khan I hlimna tur engmah thlensak lo che mah ila, keimah avanga vawi tamtak i koh thin i Pathian hming ngei khan, i tana tling zo lo kei hi MIN NGAIDAM MAWLH ANG CHE AW...
No comments:
Post a Comment