Piallei

Aw, mim ang ka pianna piallei,
I lunglai ka dum zo reng emàw;
Dàwn tamlo lungmawl ka kut hlei,
Chhim thlipui iang i lo tuar si maw!

Vui leh vai thu i aupui lo,
I chhûngah nawm tinrêng ka mák.
I thin nat tur reng ka dawn lo,
Nun nuam chauh zawngin ka vák.

Chinlem neilo ka lei hringnun,
Nang dawn lo ten ka chhiar zel a,
A lo sei ta ka nun hrui thlun,
Hai ang tarin ka lo chuai a.

Hlun lo tur chu ka lo fam ta,
Nghilh lohnan mi hrâng min vuah e!
I thuah riat hnuai ka lo zâl ta,
Duatten nangin min pawm leh e!

            Kan ruangam chu lei hmanga din niin, he leiah hian duh reng vang ni hauh lovin kan lo piang a. Piang ta na chu theihtawpin mahni ṭanghma kan hai a. Khawvel hausakna te umin theih tawp kan chhuah a, kan pian ve hma a ta tawh Leilungin a enkawl seilen- thing leh mau te, tuialhthei te leh nungcha te thlengin duhtawk kan suat a, kan ti chereu a. Mahse he leilung hian kan lakah vui thu reng a sawi ngai lo. Kumhlun tur kan nih loh avangin kan hringnun zinkawng zawh tawp hun a lo hnai a, theihtawp chhuah a in hai vur ta hrim chu mi te hriat hlawh a hlawhtling ta te pawh kan awm. Tichuan, hringnun kawng chu kan zawh tawp a, kan lei taksa chu kir leh tawh ngai lo turin lei hnuai a phum bo a lo ni leh ta a. Duhtawka a hausakna kan tlansak; he PIALLEI bawk hi kan tisa ṭawihral tur lo kuangkuah a lo pawm leh tu chu a ni lawi si. Siamtu min siam a chin a bul min ṭan saktu leh a tawp thlenga min chawitu chu he leilung ngei hi a ni e.

(13.4.2012 12 : 00 a.m a ka ziah)

'Hringnun' ka menpui!!

Zanlai pelhna pawh minute sawmriat chuang a ni leh tawh a, a khât tawka ral lehlama motor tlan ri bak thawm dang hriat tur a awm tawh lo. Leilung mawinate chu zan thim rorelna chuan a hliah bo zova, chêng tam tak senga sak inchhawng ropui tak takte pawh tih thim a awmin, rauhsan ang maiin khawpui chu a reh ruih tawh. Mita hmuh theih chu  nise zawng, mumang hrang hrang thlawk noh noh chu thil che vel hmuh tur awmchhun a ni ta ve ang.

Zantin a ‘mangtha’ tia thu ka thawn thin ka thenrual te pawh mumang ramah an cheng zo tawh a, mang tha mang hlawm tak maw! A hrat zual thenkhatte erawh chuan khawvel pang lehlam a thian thar siam tumin khâwl thluak nei hmaah bawp an la khawkherh mahna! Ka hre lo le..! Kei pawhin inthawlh mai theih tura ka buatsaih tawh ka mutbu chu ka la luah lum hlei thei lo. Engdang vang nilovin Hringnun tih thumal hian ka lung a tileng tlat mai! Ka khum sira tukverhah chuan dakchhuak in ka hun kal tawhte ka han thlirkir a, Ka hringnun bul tantu ka nu leh pa ka ngaihtuah chhuak hmasa ber; Kaih leh hruai ngai ka nih laia kan sikul kawt ni sensa pawh tuar dai thaka min lo nghak fan fan thintu, ka Nu min hmangaihna ropui ka lo hriatthiam ngai lohzia te, rawltharte daisual thin hringnun kawng bumboh ka dai sual lohna tura ka Pa min zirtirna thu te chu ka han ngaihtuah chhuak thar a, min beisei loh dan leh an duhloh dan zawnga ka awm thin châng a min zilhhauna awka te, ngaihpawimawh loh theih loh an thu pek nêm leh khauh ru tak si te pawh chu!   Nunkawng tha lam ka zawh theihna tura  Hmangaihna nena min enkawltu an nih avangin ka tan chuan an ropui a ni tih hi ka thinlungah ka nemnghet nawn leh a. An mutui lai chu lawmthu va hrilh mawlh mawlh mai tak ka nâp a, mahse chu em chu fapa lungmawl  hian a tlin lo a ni!

Thlifim chuan kawmthlang te inchunga ruah tui tling chu a chhem fawn delh delh a, chu tuiah chuan zan lalnu hlimtha pawh fiahlo ruaia lang phe hlap hlapin ka hmu bawk a. Kei chu inchungsang lamah ka lo dak leh vauh vauh tawh. Ni hnih thum lai to ruahtui bua chuan boruak chu a ti vawt deuh vur a, ka suangtuahna bawk chu kawmin ‘Hringnun hi enge?’ tih te mahni ka han inzawt zui zel a. Mizo hla lenglawng, 

“Aw engan nge maw Khuanu hian

Hringnun hi a lo duan le?

Thamral leh mai tur hian em ni le,

Duh vang rengin kan piang silo!”

tih hla chu ka rilru a sak pahin a phuahtu pa rilru tur te ka han suangtuah chhin a. “Ringtute tan chuan Hringnun duan a nih chhan hi chiang reng mahse ring ve silo te tan hian enge maw a hlutna le..?” tihte ka ngaihtuah zel a. Mi chanhaite leh riangvaite tan hlei hlei hian ‘he hringnun hi engvanga duan nge?’ tih zawhna hi chhan a har dawn hian ka ring a ni. Duh vang rengin kan piang si lo! Chutah chuan heti hian mahni ka inhrilhfiah ta a-

“Hringnunah hian chhuk leh chho tamtak paltlang tur a awm a, kham leh suãr tàwn tlang tur tam tak a awm bawk. Chu harsatna hrang hrang lo thleng reng thin chu tu emaw mi chak tak rinchhan lo chuan tawrhthiam theih a ni ngai lova, mahni chakna chauh ringa Hringnun kawng hi zawh dik chi rual lah a ni hek lo. Duh vang reng a piang lo inti hringmi te hian, A duh vang renga min siamtu chakna chauh rinchhan a kan neih loh chuan, Hringnun a tuifawn nasa tak hi kan do zo lovang a, khawvelah min len bo mai dawn a lo ni. Rinchhan tur dik rinchhan tlattu chu mi vannei ber leh Hringnun awhawm neitu a lo ni mai dawn a nih hi!!..” tiin.

Mumang thlenga chu ka rilru vakvel chuan min umzui hnuin ka han harh hlawl a, ka sana chu zing dar 8 kawk vâ chungin chhuatlaiah a lo let reng mai a!...